د مقاومت جبهه ادعا کوي، چې په کابل کې یې نن ماښام د طالبانو په یوې پوستې د برید په ترڅ د یادې ډلې څلور غړي وژلي او دوه نور یې ټپيان کړي دي.
دغې جبهې په خپل اېکس کې لیکلي: «دا برید نن ماښام ۶:۴۵ بجې د عبدالحق څلور لارې ته نږدې د "شش درک" په سیمه کې شوی، چې د طالبانو د استخباراتو څانګې وسله وال پکې په نښه شوي دي.»
مقاومت جبهې دغه راز ویلي، چې په دې برید کې یې د طالبانو دوه موټر چې وسله وال یې لېږدول هم سوځولي دي.
یادې جبهې زیاته کړې، چې په دې عملیاتو کې د دوی ځواکونو یا ملکي وګړو ته زیان نه دی اوښتی.
یاده دې وي، چې څه وخت وړاندې په افغانستان کې د ملګرو ملتونو ادارې په یوه راپور کې وویل، چې د مقاومت او ازادۍ جبهې په خپلو بریدونو کې عامو خلکو ته زیان رسولی، خو مقاومت جبهې دغه تورونه بې اساسه بللي وو.