د قزاقستان لومړي وزیر اولژاس بکتنوف د اسيا او اروپا پر ګډې ټولنې غږ کړی، چې د اورګاډي له لارې دې افغانستان او پاکستان سره ونښلوي. دغه لاره د ۱۰ مېلیونه ټنه توکو د لېږد ظرفیت لري او نورو ستراتيژیکو پروژو ته هم زمینه برابرولای شي.
ټاس خبري اژانس جمعه (د زمري ۲۴مه) لیکلي؛ د قزاقستان لومړي وزیر د اسيا او اروپا ګډې ټولنې یا اوراسیا (EAEU) شورا غونډې ته ویلي، چې ارواسیا اقتصادي ټولنه باید بدیلو ټرانزیټي لارو ته وده ورکړي او د اورګاډي له لارې قزاقستان، افغانستان او پاکستان سره ونښلوي.
د بکتونوف په وینا:« باید د هغو بدیلو لارو موضوع وڅېړل شي، چې د سیمې ټول هېوادونه لېوالتیا ورسره لري. موږ له همدې امله غواړو، چې د تورغونډۍ اورګاډي پټلۍ ته پام واړوو.»
بکتونوف زیاته کړه:« موږ وړاندیز کوو، چې له مخکينۍ ژمنې سره سم د اسیايي هېوادونو د شته لویو لارو په لړ کې دې دغه موضوع هم وڅېړل شي.»
د اعلامیې له مخې؛ دغه لاره د ۱۰ مېلیونه ټنه توکو د لېږلو ظرفیت لري او نورو ستراتيژيکو پروژو ته هم زمینه برابرولای شي. د یادونې وړ ده، چې د اورګاډي دغه پټلۍ به د قزاقستان له لارې د افغانستان له تورغونډۍ څخه پيل او بیا د کراچۍ له سمندر سره نښلول کېږي.