د یمن په سوېل کې د اېټوپیايي کډوالو د یوې بېړۍ د ډوبېدو له امله چې ۱۵۴تنه سورلۍ یې لرلې، یوازې پکې ۱۲ تنه ژوندي پاتې دي.

د یمن لپاره د کډوالۍ نړۍوال سازمان رییس د اسوشېټېډپرېس خبري اژانس ته ویلي، چې د پېښې له ځایه د ۶۸ کسانو مړي موندل شوي او ۷۴ نور چې لادرکه دي، ښايي خپل ژوند یې له لاسه ورکړی وي.
د نوموړي په وینا، تر دې دمه یوازې دولس کسان له دې پېښې ژغورل شوي دي.
دا په داسې حال کې ده چې د کډوالۍ نړۍوال سازمان وایي، چې یمن لا هم د هغو ناقانونه کډوالو د پام وړ د زیاتوالي شاهد دی، چې له افریقا دغه هېواد ته داخلیږي.