د طالبانو د ریاست الوزرا اقتصادي مرستیال ملا عبدالغني برادر د باکو له نړیوال بحري بندر څخه د لیدنې پرمهال د دې بندر له لارې اروپا ته د افغانستان د صادراتو لپاره د اسانتیاوو برابرولو غوښتنه کړې ده. اذربایجاني چارواکو هم ویلي چې افغانستان د خپلو صادراتو لپاره د باکو بندر کارولی شي.
د طالبانو د ریاست الوزرا اقتصادي معاونیت د شنبې په ورځ پر اېکس پاڼې لیکلي، چې ملا عبدالغني برادر د اذربایجان هېواد د باکو بحري بندر له لارې اروپا ته د افغانستان د صادراتو لپاره د اسانتیاوو برابرولو غوښتنه کړې ده.
په خبرپاڼه کې راغلي، چې د باکو بندر او د دغه هېواد د اوسپنې پټلۍ مسولینو طالبانو ته د افغانستان صنعتي توکو، کرنیزو محصولاتو او کاني توکو د صادراتو لپاره د دغه بندر کارونې ته چمتوالی ښودلی دی او همدارنګه اذربایجاني چارواکو د اوسپنې پټلۍ په وسیله د ایران له لارې روسیې ته هم د افغانستان د سوداګریزو توکو د انتقال لپاره چمتوالی ښودلی دی.
طالبان وایي، چې د باکو بحري بندر له لارې د ګډې سوداګرۍ او ترانزیټ د رامنځته کولو او اسانتیاوو په موخه یې په دغه بندر کې د سوداګرۍ لپاره د امکاناتو او ترانسپورټي لارو د اروزنې په موخه کډې تختیکي کمېټې هم ټاکلي.