د امریکا متحده ایالاتو فدرالي ادارو خبرداری ورکړی چې له ایران سره تړلې سایبري ډلې او هېکران ممکن د امریکا پر شرکتونو، دفاعي برخو او حیاتي زیربناوو، په ځانګړې توګه هغو ادارو، چې له اسراییل سره اړیکې لري، بریدونه وکړي.
په دغه خبرداري کې چې د ایف بي ای ملي امنیت ادارې، د دفاع وزارت د سایبري جرمونو مرکز او کورنیو چارو وزارت د سایبري دفاع څانګې له خوا ورکړل شوي، ویل شوي سره له دې چې تر دې دمه له ایران سره تړليو هیکرانو له خوا د پراخو سایبري بریدونو نښې نه دي لیدل شوې، خو اړوندې ادارې باید د خپلو امنیتي سیستمونو ساتنې ته جدي پاملرنه وکړي.
په یاد خبرداري کې ویل شوي چې له ایران سره د موجود اوربند او دایمي حل لپاره پر روانو مذاکراتو سربېره، هېکران او ایران اړوند سایبري لوبغاړي لا هم کولی شي خطرناک سایبري فعالیتونه ترسره کړي.
د سایبري امنیت چارواکي وايي، د ایران له ملاتړه برخمن هیکران معمولا د سافټویرونو هغه نسخې هدف ګرځوي چې تازه شوې نه وي، یا په کمزورو پاسورډونو سره کار کوي. دوی همداراز ډیټا بندوي، غلا کوي او یا یې افشا کوي.