د غزني ولایت لپاره د طالبانو د اطلاعاتو او کلتور رییس وایي، چي د دې ولایت له موزیم څخه اته قلمه تاریخي اثار د قطر نړیوال نندارتون ته لېږدول کیږي.
ملا حمیدالله نثار زیاتوي چې دا اثار د اسلامي تمدن سره تړاو لري او دا به د افغاستان د تاریخي ارزښتونه استازیتوب وکړي.
د طالبانو د غزني ولایت د اطلاعاتو او کلتور رییس ملا حمیدالله نثار دغې ډلې ته نږدې رسنۍ امید راډیو سره په مرکه کې د دې اثارو د لېږد په اړه ویلي.
په غزني کې فرهنګي فعالان دا کار کلتوري پرمختک بولي او زیاتوي چې افغانستان د تېرو جګړو ترڅنګ غني تمدن لري.
د غزني لپاره د طالبانو د اطلاعاتو او کلتور ریاست دا نه ده په ډاکه کړې، چې دا اثار به په څه ډول او د څومره وخت لپاره قطر ته ولېږدول شي او نه دا روښانه ده، چې کېدونکی نندارتون په کومه نېټه ترسره کېږي.
د غزني موزیم د افغانستان یوه له مهمو موزیمونو بلل کېږي، چېرې چې د اسلامي دورې تاریخي اثار پکې ساتل کېږي