د طالبانو د هرات د مخابراتو او معلوماتي ټکنالوژۍ ریاست ویلي، چې په کرخ ولسوالۍ کې د نوري فایبر یوه مهمه پروژه د ۴۲ میلیونه افغانیو په لګښت پیل شوې ده.
د طالبانو تر واک لاندې د باختر اژانس د راپور له مخې، د دغه ریاست رییس حافظ خیرالله خیرخواه ویلي چې د پروژې ټول لګښت د افغان ټلیکام شرکت له لوري ورکړل شوی او په لومړي پړاو کې به ۴۵ کیلومتره نوري فایبر وغځول شي.
د طالب چارواکو په وینا، دغه پروژه به نه یوازې د انټرنټي خدماتو ساحه پراخه کړي، بلکې د مخابراتي زیربناوو د پیاوړتیا، د انټرنټي بیو راکمول او د هېواد دیجیتلي کولو ملي هدف ته د رسېدو په برخه کې یو مهم ګام بلل کېږي.