د ملګرو ملتونو امنیت شورا غړو د پاکستان دا غوښتنه رد کړې چې د ترهګرۍ ضد څلورو مهمو کمیټو مشري ور وسپاري.
ټایمز اف انډیا وايي، پاکستان ته یوازې د ۱۹۸۸ د طالبانو د بندیزونو کمیټې مشري ورکړل شوې او د ۱۳۷۳ ترهګرۍ ضد کمیټې یوازې نایب مشري ورکړل شوې ده، چې یو تشریفاتي مقام ګڼل کېږي.
پاکستان، چې اوس د امنیت شورا غیر دایمي غړی دی، غوښتنه کړې وه چې د ۱۲۶۷ بندیزونو کمیټې، ۱۵۴۰ (د وسلو نه خپرېدو) بندیزونو کمیټې، ۱۹۸۸ د طالبانو کمیټې او ۱۳۷۳ د ترهګرۍ ضد کمیټې مشري ورکړل شي. خو د شورا دننه د اجماع نشتوالي له امله دغه غوښتنې رد شوې او یوازې د طالبانو کمیټې مشري ورکړل شوې ده.
یوه چارواکي ټایمز اف انډیا ته ویلي، چې د پاکستان دغو غوښتنو د کمیټو د ویش بهیر شاوخوا پنځه میاشتې وځنډاوه، حال دا چې دا بهیر باید د ۲۰۲۵ کال تر جنورۍ بشپړ شوی وای.
یاد چارواکی زیاتوي چې د امنیت شورا دایمي غړي (چین، فرانسه، روسیه، برېتانیا او امریکا) غواړي د کمیټو مشري نورو غړو ته پرېږدي، ځکه پرېکړې باید د اجماع له لارې وشي.
یاده هندۍ رسنۍ وايي، پاکستان ته د طالبانو د بندیزونو کمیټې مشري ورکړل شوې، خو د هند لپاره دا ډاډمنه ده چې په دې کمیټه کې د روسیې او ګیانا حضور شته، چې «د هند متحدین» بلل کېږي.
هندي چارواکي وایي، دوی به له خپلو دوستو هېوادونو سره په شورا کې نږدې کار ته دوام ورکړي.