د هند د دفاع وزیر راج نات سېنګ وایي، چې له دې وروسته به د هند سمندري ځواک د پاکستان د هر ډول احتمالي برید په وړاندې د نوي ډیلي د ځواب ورکولو قومانده په غاړه لري.

هغه د هند د لویدیځ ایالت ګوا په ساحل کې د الوتکو لېږدونکې بېړۍ (INS) ویکرانت کې د سمندري ځواکونو سرتېرو ته په خبرو کې وویل: «که پاکستان کوم بد یا غیر اخلاقي کار ته مخه کړي، نو دا ځل به د هند د سمندري ځواکونو د درنو ډزو او قهر سره مخ شي.»

د یادولو وړ ده، چې د هند او پاکستان ترمنځ اړیکې په روانه میاشت کې له څلور ورځنیو نښتو وروسته، چې په کې جنګي جیټ الوتکې، توغندي، ډورن او توپخانې وکارول شوې، لا هم ترینګلې دي.