د امریکا ولسمشر ډونالد ټرمپ د سېشنبې په ورځ په ریاض کې اعلان وکړ چې د سعودي عربستان له وليعهد محمد بن سلمان او د ترکیې له ولسمشر سره تر خبرو وروسته، پر سوریې بندیزونه ختموي.
نوموړي وویل، امریکا له سوریې سره د اړیکو عادي کولو لپاره لومړني ګامونه اخیستي دي.
ټرمپ زیاته کړه چې د امریکا او سوریې د بهرنیو چارو وزیران به په دې اونۍ کې وویني.
ټرمپ د ایران په اړه وویل، چې « زه غواړم له ایران سره یوه موافقه وکړم څو نړۍ یو خوندي ځای شي».
هغه د سوریې د حکومت لپاره د بریا هیله څرګنده کړه.
ټرمپ وویل چې « شهزاده محمد بن سلمان ډېر سخت کار کوي زه فکر نه کوم چې هغه حتا د شپې ویده شي».
هغه زیاته کړه، چې د پاچا سلمان او شهزاده محمد بن سلمان په مشرۍ سیمه کې یو فوقالعاده او ژور بدلون روان دی.