د روسیې ولسمشر ولادیمیر پوتن د دوشنبې په ورځ له اوکراین سره د جګړې لپاره د مې په میاشت کې د درې ورځني اوربند اعلان وکړ.
دا اوربند د دویمې نړیوالې جګړې په ترڅ کې د شوروي اتحاد او د هغه د متحدینو د بري د ۸۰ کلیزې په مناسبت دی.
کرملین وویل چې دا ۷۲ ساعته اوربند به د مې له۸مې نېټې پیل شي او د مې تر۱۰مې نېټې پورې به دوام ولري.
روسیې له اوکراین څخه هم غوښتنه کړې چې په دغه اوربند کې ګډون وکړي.
په اعلامیه کې د کرملین له خوا ویل شوي چې که اوکراین له دغه اوربنده سرغړونه وکړي، نو د روسیې پوځ به « وړ او اغیزناک ځواب» ورکړي.
دا اعلان د امریکا د ولسمشر ټرمپ له وروستي ټولنیز پیغام وروسته کیږي، چې پر پوتین یې د بمباریو درولو غږ کړی و.
ټرمپ د شنبې په ورځ د اوکراین له ولسمشر ولادیمیر زیلینسکي سره تر لیدنې وروسته وویل چې شک لري پوتین رښتیا هم د سولې اراده ولري.
ټرمپ په خپل پیغام کې ولیکل: « کېدای شي هغه (پوتین) نه غواړي جګړه بنده کړي، یوازې وخت تېروي او باید په بل ډول ورسره چلند وشي».
روسیې مخکې هم د ټرمپ ادارې په هڅو د اوکراین له خوا د منل شوي ۳۰ ورځني بې قید او شرطه اوربند رعایت کول رد کړي وو. همداراز، د پوتین له خوا د ایسټر جشن لپاره اعلان شوی یو ورځنی اوربند هم بشپړعملي نه شو، خو دواړو لوریو ومنله چې د شخړو په شدت کې کمی راغلی و.