فاکس نیوز راپور ورکړی، چې په غزه کې د «امیر» په نوم یو ماشوم چې مخکې د اسراییلي پوځ له لوري یې د وژل کېدو راپور ورکړل شوی و، ژوندی موندل شوی دی. د ماشوم اصلي نوم عبدالرحیم محمد حمدان دی، چې د «عبود» په نوم پېژندل کېږي او له خپلې مور نجلاء سره له غزې وتلی دی.
۸ کلن عبود فاکس نیوز ته ویلي: «له غزې بهر ژوند ښکلی دی.» په راپور کې راغلي، چې د عبود او د هغه د مور هویت د «غزې مرستندویه بنسټ» له لوري د څېرې پېژندنې د سافټویر له لارې تایید شوی دی.
د عبود د وژل کېدو کیسه په لومړي ځل د انتوني اګیلار له لوري خپره شوې وه، چې د غزې د مرستندویه بنسټ پخوانی قراردادي او د امریکا د پوځ تقاعد شوی افسر دی.
هغه ویلي و، چې د اسراییل د پوځ له خوا د یوه وژونکي برید شاهد و.
د غزې مرستندویه بنسټ ویلي، چې عبود او د هغه مور د یو شمېر پخوانیو امریکايي سرتېرو په مرسته خوندي ځای ته انتقال شوي او دوی باور لري، چې دا مور او زوی به اوس نوی ژوند پیل کړي.