د پولنډ سرحدي پولیسو دوه هغه افغان کډوال ونه منل، چې پر پوله له اوښتلو وروسته له جرمني نه بېرته دغه هېواد ته شړل کېدل.

د جرمني د میرکور رسنۍ د رپوټ له مخې، دغه پېښه د برانډنبورګ ایالت د ګوبن ښار په سرحدي سیمه کې شوې.

د کډوالۍ غوښتونکي دوه افغانان (یو ۲۰ کلن او بل ۲۳ کلن) وو، چې ویل کیږي له پولنډ څخه تازه د سرحدي پله له لارې جرمني ته تللي ول او غوښتل یې په جرمني کې د کډوالۍ غوښتنه وکړي، خو د جرمني د کورنیو چارو وزیر الکساندر دوبریندتد نوي سیاست له مخې، چې د «کډوالۍ پالیسي بدلون» په نامه یاد شوی، رد شول.

د جرمني فدرالي پولیسو غوښتل دغه نوی قانون عملي کړي او دواړه افغانان سره له دې چې د پناه غوښتنه یې کړې وه، پولنډ ته واستوي. خو کله چې د پولنډ سرحدي پولیسو بېرته رد کړل، نو پولیسو بیا هڅه ونه کړه او هغوی یې د پناه غوښتونکو د ساتنې لومړني مرکز ته واستول.

پولنډ له مخکې هم د جرمني د کډوالو د بیرته ستنولو غوښتنې رد کړې دي.

پولنډ وايي، چې که کسان له سرحدي پله یو کیلومتر لرې وي، نو نه شي ویل کېدای چې دوی له پولنډه ورغلي دي.