طالبانو له روسیې غوښتي، چې د افغانستان د ځنډول شویو چاپېریالي پروژو د خلاصولو، په نړۍوالو غونډو کې د افغان پلاوي د سفر د زمینې برابرولو او په نړۍوالو چاپېریالي کنوانسیونونو کې د افغانستان د طرحو د ملاتړ په برخه کې همکاري وکړي.
مطیع الحق خالص د روسیې سفیر دیمیتري ژیرنوف ته ویلي، چې افغانستان او د سیمې هېوادونه د اقلیمي بدلون په راوستلو کې ډېر ښکېل نه دي، خو له ناوړه اغېزو څخه یې ډېر اغېزمن شوي دي نو په کار ده، چې له اقلیمي بدلون سره په ګډه مبارزه وشي.
په کابل کې بیا د روسیې سفیر دیمیتري ژیرنوف یادې ډلې ته ډاډ ورکړی، چې وړاندیزونه به یې له مسکو سره شریک کړي.
دا په داسې حال کې ده، چې د طالبانو تر واک لاندې د چاپیریال ساتنې ملي ادارې عمومي رییس مطیعالحق خالص تېره ورځ په کابل کې د اذربایجان له سفیر الهام محمدوف سره په لیدنه کې په راتلونکې «کاپ ۳۰» نړۍوال اقلیمي کنفرانس کې د دغه هېواد د ملاتړ غوښتنه وکړه.
ټاکل شوې، چې دغه کنفرانس په برازیل کې ترسره شي.