خبرگزاری باختر، تحت کنترول طالبان روز شنبه ۲۴ عقرب گزارش داد که یک «هیئت بلندرتبه تاجیکستان» وارد کابل شده است. طبق گزارش، نمایندگان وزارت خارجه و ادارات امنیتی تاجیکستان در ترکیب این هیئت است.

گفته شده قرار است مقام‌های طالبان و تاجیکستان درباره سفارت افغانستان در دوشنبه گفت‌وگو کنند.

به نوشته رسانه‌های تحت کنترول طالبان، هدف از سفر هیئت تاجیکستان، گسترش روابط سیاسی، اقتصادی و امنیتی است.

گفت‌وگو درباره پروژه‌های مشترک از دیگر موضوعات دیدار مقام‌های طالبان و تاجیکستان خوانده شده است.

سفر هیئتی از تاجیکستان به کابل در حالی انجام شده که چند روز پیش هم شماری از مقام‌های این کشور به ولایت قندوز رفتند و با مسئولان طالبان دیدار کردند.

پیش از آن، یوسف وفا، والی طالبان در بلخ و از چهره‌های نزدیک به هبت‌الله‌آخندزاده، رهبر طالبان به دعوت تاجیکستان به دوشنبه سفر کرده بود. او در دیدار با مقام‌های تاجیکستان، خواستار واگذاری سفارت افغانستان در دوشنبه به اداره طالبان شد.

در حال حاضر سفارت افغانستان در دوشنبه در کنترول نماینده دولت ساقط شده افغانستان است، اما قنسولگری افغانستان در شهر خاروغ تاجیکستان به طور مستقیم تحت حمایت و زیر نظر وزارت خارجه طالبان کار می‌کند.

تاجیکستان از جمله کشورهایی آسیای میانه است که کمترین روابط دیپلوماتیک با طالبان را در چهار سال گذشته داشته است.