سازمان بین‌المللی مهاجرت با اشاره به «سرنوشت نامعلوم» هزاران مهاجر اخراج‌شده از پاکستان گفته است که اکثریت آنان را کودکان و زنان آسیب‌پذیر تشکیل می‌دهند.
به نقل از این سازمان، مهاجران بازگشتی «ترسیده و به‌شدت آسیب‌پذیر هستند.»

همزمان با اخراج اجباری ده‌ها هزار مهاجر افغان از پاکستان، سازمان بین‌المللی مهاجرت هشدار داده که «آنان با آینده نامعلوم در کشوری مواجه اند که بیش از نیمی از جمعیت آن به کمک‌های بشردوستانه وابسته است.»
بسیاری از مهاجران افغان در پاکستان متولد شده و یا دهه‌ها در آنجا زندگی کرده‌اند، به نقل از سازمان بین‌المللی مهاجرت «آن‌ها اکنون به کشوری باز می‌گردند که نمی‌شناسند.»
از اول ماه اپریل تا ۱۲ ماه می سال جاری میلادی، سازمان بین‌المللی مهاجرت برای بیش از ۶۸ هزار عودت کننده کمک‌های همانند سرپناه، پول نقد، غذا، مراقبت‌های صحی، خدمات حمایوی را فراهم کرده است.
بر بنیاد آمار کمیسیون ملی مهاجران پاکستان، از آغاز روند اخراج مهاجران تاکنون دست‌کم یک میلیون و ۳۰۰ هزار افغان از این کشور اخراج شده‌اند و روند اخراج اجباری مهاجران افغان همچنان ادامه دارد.