رئیس کمیته دولتی امنیت ملی تاجیکستان، خواهان اجرای روش‌های عملیاتی جدید در مرزهای افغانستان شد.

سیمومین یتیموف می‌گوید که تهدید تروریسم بین‌المللی و شکل‌گیری کانون‌های تنش در نزدیکی مرزها، به‌ویژه در افغانستان نیازمند روش‌های کاری جدید است.

او در پنجاه و ششمین نشست شورای روسای امنیتی و سرویس‌های ویژه کشورهای مستقل مشترک‌المنافع، از وضعیت افغانستان هشدار داد.

به گزارش خبرگزاری تاس، این مقام ارشد امنیتی تاجیکستان، تروریسم بین‌المللی را یکی از تهدیدهای اصلی برای کشورهای مستقل مشترک‌المنافع خواند و گفت «ماهیت فرامرزی این پدیده مخرب و شکل‌گیری کانون‌های تنش در نزدیکی مرزهای کشورهای مشترک‌المنافع، به‌ویژه در افغانستان، نیازمند تلاش‌های مشترک ما، تبادل به‌موقع اطلاعات و به‌روزرسانی مداوم روش‌ها و مهارت‌های کار عملیاتی است.»

پنجاه و ششمین نشست شورای روسای امنیتی و سرویس‌های ویژه کشورهای مستقل مشترک المنافع روز جمعه ۲۶ ثور در شهر در دوشنبه برگزار شد.

روسیه، تاجیکستان، آذربایجان، ارمنستان، بلاروس، قزاقستان، قرغیزستان و اوزبیکستان از اعضای این شورا هستند. ترکمنستان به عنوان ناظر در این جلسه شرکت داشت.

رئیس کمیته امنیت ملی تاجیکستان این نشست را برای تبادل نظر و تجربیات در حوزه امنیت مهم خواند.

به گفته وی، این شورای کشورهای مستقل مشترک‌المنافع به عنوان یک حلقه مهم برای توسعه همکاری بین کشورها در مورد مسائل امنیتی عمل می‌کند.

امامعلی رحمان، رئیس‌جمهور تاجیکستان نیز در این نشست حضور داشت.

او از کشورهای مستقل مشترک المنافع خواست تا به دلیل چالش‌های فزاینده، همکاری‌های امنیتی خود را تقویت کنند.

به گفته وی، چالش‌های اصلی امروز تروریسم بین‌المللی، افراط‌گرایی، رادیکالیسم، قاچاق مواد مخدر، قاچاق غیرقانونی اسلحه و رشد جرایم سایبری است.

تاجیکستان در سال ۲۰۲۵ ریاست دوره‌ای اتحادیه کشورهای مستقل مشترک‌المنافع (CIS) را بر عهده دارد. تقویت همکاری‌های امنیتی از اولویت‌های اصلی تاجیکستان در دوره ریاست اعلام شده است.