نزدیکان عبدالعلیم خاموش، معلم محکوم به اعدام، می‌گویند طالبان تنها به‌دلیل تاکید بر اهمیت علوم عصری، او را مجازات می‌کنند.

طالبان این معلم را به «توهین به مقدسات» متهم کرده‌اند. اما نزدیکان او می‌گویند این اتهام نادرست و بی‌اساس است.

علیم خاموش، معلم یک مکتب در پکتیکا، از سوی طالبان به اتهام «توهین به پیامبر اسلام» به اعدام محکوم شده است.

افراد نزدیک به این معلم اتهام طالبان را نادرست و بی‌اساس می‌دانند. به گفته بستگانش، خاموش فردی مومن، باهوش و طرفدار علوم عصری است. آن‌ها می‌گویند طالبان تنها به‌دلیل حمایت او از علوم مدرن، او را مجازات می‌کنند.

خانواده خاموش خواستار دسترسی او به وکیل مدافع شده‌اند، اما تاکنون وکیلی برایش تعیین نشده است.

طالبان پیش‌تر او را به‌دلیل صحبت درباره اهمیت علوم عصری بازداشت و به دو سال زندان محکوم کرده بودند اما اخیراً دادگاه این گروه حکم اعدام این معلم را صادر کرده است.

نهادهای حقوق بشری خواهان لغو فوری حکم اعدام آقای خاموش و آزادی بی‌قید و شرط او از زندان شده‌اند.