تاجیکستان ۲۵ بورسیه تحصیلی برای دانش‌آموزان افغان مکتب تعلیمات عمومی سامانیان اعطا کرد. ظاهر اغبر، سفیر افغانستان در تاجیکستان گفت که در این بورسیه‌ها به دانش‌آموزان دختر اولویت داده شده است.

لیسه سامانیان مکتبی در تاجیکستان است که دانش‌آموزان افغان در آن آموزش می‌بینند.

ظاهر اغبر روز سه‌شنبه، سوم اسد در یادداشتی در شبکه اجتماعی اکس خبر داد که قرار است آزمونی در این راستا روز سه‌شنبه برگزار و فهرست مستحقین به وزارت محترم معارف و تحصیلات عالی تاجیکستان سپرده شود.

او گفت مقام‌های این کشور بر حمایت از ادامه تحصیل دختران افغان تاکید کرده‌اند. این لیسه بیش از دو دهه پیش برای آموزش مهاجران افغان در شهر دوشنبه تاسیس شد و با کمک هزینه‌های حکومت پیشین افغانستان فعالیت می‌کرد.

آموزش دختران در مکاتب بالاتر از صنف ششم و دانشگاه‌ها پس از حاکمیت دوباره طالبان بر افغانستان ممنوع شد. تداوم این وضعیت در کشور واکنش‌های جهانی زیادی را به دنبال داشته است.