مصور بهادری، رئیس کمیته پناهندگان افغان در شهر دوشنبه، گزارش‌ها درباره تعیین ضرب‌الاجل و اخراج اجباری مهاجران افغان از تاجیکستان را رد کرد.

او به خبرگزاری آسیاپلاس تاجیکستان گفته است که تاکنون کسی درباره اخراج اجباری به کمیته پناهندگان افغان مراجعه یا شکایت نکرده است.

پیشتر گزارش شده بود که تاجیکستان برای خروج مهاجران افغان مهلت ۱۵ روزه تعیین کرده است.

سفارت افغانستان در دوشنبه نیز به خبرگزاری آسیاپلاس گفته است که این سفارت هیچ اطلاعی در مورد «اقدامات انجام شده توسط مقامات تاجیکستان» در مورد پناهندگان افغان ندارد.

مقام‌های رسمی تاجیکستان تاکنون در این مورد اظهار نظر نکرده‌اند.

تا پایان سال ۲۰۲۴، حدود ۹ هزار مهاجر افغان به‌طور رسمی در تاجیکستان ثبت شده بودند.

بسیاری از افغان‌های ساکن تاجیکستان، کارمندان دولت پیشین افغانستان، نظامیان، یا کسانی هستند که با دولت قبلی همکاری داشته و پس از سقوط کابل در آگست ۲۰۲۱ از کشور گریخته‌اند.

در صورتی که مقام‌های رسمی تاجیکستان خروج اجباری را تایید کنند، این دستور هزاران افغان را تحت تاثیر قرار می‌دهد؛ از جمله کسانی که مدارک پناهندگی از سازمان ملل دارند و در انتظار اسکان مجدد در کشورهای غربی هستند.