وزارت خارجه پاکستان روز پنجشنبه، اول جوزا یک دیپلومات دیگر هند در اسلام‌آباد را «عنصر نامطلوب» خواند و به او ۲۴ ساعت فرصت داد تا خاک پاکستان را ترک کند.

به گزارش رسانه‌ها، هند هم یک دیپلومات پاکستانی در دهلی‌نو را به «جاسوسی» متهم و دستور اخراجش را صادر کرده است.

وزارت خارجه پاکستان در خبرنامه‌ای نوشت کاردار سفارت هند در اسلام‌آباد را احضار و این موضوع را با او شریک کرده است.

پاکستان دیپلومات هندی را متهم به انجام فعالیت‌های خارج از ماموریت دیپلوماتیک‌اش کرده است.

این اقدام پاکستان، در واکنش به تصمیم اخیر وزارت خارجه هند اتخاذ شده است.

هند هم پیشتر یک دیپلومات سفارت پاکستان در دهلی‌نو را به «جاسوسی» متهم کرده و او را «عنصر نامطلوب» اعلام کرد. دهلی نو به این دیپلومات پاکستانی ۲۴ ساعت فرصت داده بود که خاک هند را ترک کند.

این دومین بار است که هند و پاکستان پس از درگیری مرگبار دیپلومات‌های هم‌دیگر را اخراج می‌کنند.

.