کرملېن اعلان کړی چې ولسمشر ولادیمیر پوتین د اوکراین د جګړې د پای ته رسولو لپاره د امریکا ځینې وړاندیزونه منلي، ځینې یې رد کړي، خو د سولې طرح یې رد کړې نه ده. هغه وویل، چې « ځینې وړاندیزونه ومنل شول، ځینې د منلو نه وو او دا د جوړجاړي موندلو طبیعي بهیر دی».
د کرملېن ویاند دميتري پيسکوف دا څرګندونې د امریکا د ولسمشر ډونالډ ټرمپ له ځانګړي استازي سټیو وټکاف سره د پوتین له خبرو وروسته وکړې.
پیسکوف وویل: « لومړی ځل مستقیم نظرونه سره تبادله شول. ځینې وړاندیزونه ومنل شول، ځینې د منلو نه وو، او دا د جوړجاړي موندلو طبیعي بهیر دی».
هغه زیاته کړه چې روسیه د ولسمشر ټرمپ د هڅو منندویه ده، خو خبرې دومره حساسې دي چې علني تبصرې پرې ګټورې نه دي.
پیسکوف وویل چې اوس خبره د تخنیکي ټیمونو په کچه روانه ده او د هغوی پایلې به د راتلونکو جګپوړو ناستو بنسټ جوړ کړي.
له دې مخکې د روسیې د ولسمشر سلاکار هم ویلي وو چې د اوکراین د شخړې د حل لپاره لا هم د جوړجاړي کومه طرحه نهده موندل شوې. اوشاکوف زیاته کړې وه، چې « د امریکایانو ځینې وړاندیزونه د سولې د هواري لپاره د منلو وړ ښکاري، خو باید پرې بحث وشي».
د نوموړي په وینا، « هغه الفاظ او عبارتونه چې موږ ته وړاندیز شوي، ځینې یې د منلو وړ نه دي».