د ترکیې د پوځ یوه سي ۱۳۰ بار وړونکې الوتکه د سېشنبې په ورځ له اذربایجان څخه تر الوتنې وروسته په جورجیا کې پریوته. په الوتکه کې ۲۰ تنه سپاره وو.
د پېښې له اعلان وروسته، د ترکیې ولسمشر رجب طیب اردوغان د "شهیدانو"ارواوو ته دعا وکړه او د ژغورنې ډلې د پېښې ځای ته روانې شوې.
د ترکیې دفاع وزارت ویلي، دا پېښه د جورجیا د پولې ترڅنګ شوې او له جورجیايي چارواکو سره یې په ګډه هڅې روانې دي چې د پېښې ځای ته ورسېږي.
ولسمشر اردوغان، چې په انقره کې وینا کوله د همکارانو له خوا له پېښې خبر شو.
تر اوسه د الوتکې د سقوط لامل او د مرګژوبلې کره شمېر لا نه دي څرګند شوي خو ځایي رسنیو خبر ورکړی چې په الوتکه کې د ترکیې او اذربایجان سرتېري سپاره وو.
د ترکیې د کورنیو چارو وزیر علي یرلیکایا ویلي چې له جورجیايي سیال سره یې ټیلیفوني خبرې کړې او د جورجیا وزیر د پېښې ځای ته د تګ په حال کې دی.