د ډله ییز امنیت تړون سازمان د وزیرانو شورا تر چتر لاندې د افغانستان د چارو د کاري ډلې ۴۱مه غونډه کې د افغانستان پر روان وضعیت خبرې شوې او د متوجه امنیتي ګواښونو له اړخه اندېښنې ښودل شوې دي.
د یاد سازمان د وزیرانو شورا ټینګار کړی، چې د ډله ییز امنیت تړون سازمان (CSTO) غړي هېوادونه باید د افغانستان له ولس سره خپلو بشري او اقتصادي مرستو ته دوام ورکړي.
په غونډه کې د یاد سازمان مرستیال سرمنشي سومات اردوبایف، د غړو هېوادونو استازو او د یو شمېر نړیوالو ادارو استازو ګډون کړی و.
د غونډې ګډونوالو دا هم څرګنده کړې، چې د افغانستان له وضعیت څخه باید دوامداره څارنه وشي او د سولې د پروسې د پیاوړتیا لپاره سیمهییزې هڅې همغږې شي.
په یاده غونډه کې د ملګرو ملتونو د ترهګرۍ ضد دفتر، د منځنۍ اسیا لپاره د ملګرو ملتونو سیمهییز مرکز، د ګډو هڅو مرکز، د ګډو ځواکونو د قوماندانانو د شورا همغږوالې ادارې او د سره صلیب نړیوالې کمېټې استازو هم برخه لرله.