در پی کشته شدن پنج شهروند چین در مرز افغانستان و تاجیکستان، سه منبع امنیتی تاجیکستان به رویترز گفتند که این کشور درباره احتمال استقرار نیروهای روسی برای گشتزنی مشترک در مرز افغانستان و تاجیکستان در حال مذاکره با روسیه و سازمان پیمان امنیت جمعی است.
امامعلی رحمان، رئیسجمهور تاجیکستان، روز دوشنبه با رؤسای نهادهای امنیتی این کشور گفتوگو کرده است. همزمان چین نیز به شهروندان خود که در فعالیتهای معدنی و تجاری در منطقهٔ مرزی مشغولاند، توصیه کرده که فوراً آنجا را ترک کنند.
یک مقام شورای امنیت تاجیکستان، به رویترز گفت که مقامات تاجیک با روسیه درباره احتمال استقرار نیروهایی روسی از پایگاه نظامی روسیه که در نزدیکی پایتخت تاجیکستان موقعیت دارد، برای گشتزنی مشترک در مرز گفتوگو کردهاند.
این پایگاه بزرگترین تأسیسات نظامی خارجی روسیه است و در نزدیکی دوشنبه، موقعیت دارد.
این منبع به رویترز گفت: «ما در حال حاضر در گفتوگو هستیم. فکر میکنم این هفته تصمیمی اتخاذ شود.»
وزارت خارجه طالبان سهشنبه اعلام کرد که امیرخان متقی در تماس تلفنی با سراجالدین مهرالدین، وزیر خارجه تاجیکستان نسبت به کشتهشدن شهروندان چینی ابراز تأسف کرد. متقی گفت طالبان برای تامین امنیت مرزها و تحقیقات مشترک درباره این حادثه آمادگی کامل دارد.
رویترز نوشت که در صورت موفقیت این مذاکرات، روسیه از بالگرد برای کمک به گشتزنی در مرز تاجیکستان با افغانستان که از مناطق کوهستانی عبور میکند، استفاده خواهد کرد.
وزارتهای دفاع تاجیکستان، روسیه و سازمان پیمان امنیت جمعی به رهبری مسکو، که به گفته منابع در این مذاکرات دخیلند، از اظهارنظر در این مورد خودداری کردهاند.
در کمتر از یک هفته گذشته دستکم پنج نفر از شهروندان چین در دو رویداد امنیتی در مرز افغانستان-تاجیکستان کشته شدند. چین تایید کرده است که شهروندانش روز یکشنبه در نزدیکی مرز افغانستان، هدف یک حمله مسلحانه قرار گرفتهاند. روز جمعه نیز این کشور اعلام کرده بود که در یک حمله مرزی دیگر، سه شهروند چین کشته شدهاند.
تاجیکستان میگوید حمله نخست به وسیله پهپادی انجام شد که نارنجک پرتاب میکرد.
تا اوایل دهه ۲۰۰۰ میلادی، پایگاه روسیه همراه با نیروهای مرزبانی روس، مسئول حفاظت از مرز تاجیکستان و افغانستان بودند. تاجیکستان از سال ۲۰۰۵ تاکنون بهطور مستقل از مرز خود حفاظت میکند.